Ni ddylai ffermwyr a rheolwyr tir oedi wrth wneud cais am grantiau: CLA Cymru

“Dylai ffermwyr, tyfwyr bwyd a phlannwyr coed fanteisio ar gyllid newydd sydd ar gael, a chanolbwyntio ar wneud ceisiadau yn gywir ac yn brydlon,” meddai Fraser McAuley, Ymgynghorydd Polisi CLA Cymru. “Mae ffenestri Mynegi Diddordeb y cronfeydd yn agor rhwng nawr a mis Mehefin. Ein cyngor yw bod mantais yn bendant wrth wneud cyflwyniadau yn gynnar — nid yn unig i fod ar frig y rhestr geisiadau, ond oherwydd gallai fod angen amser ar gyfer darparu gwybodaeth ychwanegol neu wneud addasiadau.”

“Mae llu o gymorth ar gael ar gyfer buddsoddi mewn offer a thechnoleg newydd, rheoli adnoddau naturiol, cynhyrchu organig, garddwriaeth, rheoli slyri, cadwyni cyflenwi bwyd a chreu coetiroedd. Mae hwn yn rhan o becyn cymorth gwerth £227 miliwn dros y tair blynedd nesaf.”

“Dylai ymgeiswyr ganolbwyntio ar yr un ar ddeg grant neu'r cynlluniau a deall sut y gall y rhain gefnogi eu cynlluniau busnes. Yn yr un modd, dylai'r cyfle o adnoddau newydd sydd ar gael annog rheolwyr tir entrepreneuraidd i wneud blaenoriaethau newydd ac ymgymryd â phrosiectau newydd. Gallai hyn fod yn bwysig iawn wrth i ni symud i'r cyfnod pontio i Gynllun Ffermio Cynaliadwy newydd Cymru, sydd ar fin cael ei amlinellu yn ddeddfwriaeth Llywodraeth Cymru yr haf hwn.”

Ychwanega Fraser, “Cyhoeddodd Llywodraeth Cymru y cyllidebau adrannol yn ddiweddar, ac rydym wedi gweld y Strategaeth Buddsoddi mewn Seilwaith, a wnaeth rywfaint o ddyraniad ar gyfer pontio amaethyddol. Er ein bod yn croesawu'r cyhoeddiad o gefnogaeth i amaethyddiaeth, garddwriaeth, coedwigaeth a rheoli tir, mae'r cyhoeddiadau diweddar yn codi cwestiynau ynghylch sut mae'r gwahanol gyllidebau yn cyd-fynd gyda'i gilydd dros amserlenni penodol. Rhaid inni benderfynu a yw'r adnoddau a gyhoeddwyd yn diwallu anghenion y sector a sut i sicrhau ei fod yn parhau i fod yn gystadleuol yn fyd-eang. Mae angen i ni weld y darlun mawr. Byddwn yn gweithio gyda'r Llywodraeth i gael yr eglurder angenrheidiol.”

Mae cyhoeddiad Llywodraeth Cymru am gyllid yma. Mae'r crynodeb o'r cynlluniau sydd ar ddod yma.