Adnodd newydd i athrawon ar faterion cefn gwlad

Mae dau sefydliad gwledig wedi ymuno i addysgu plant sut i weithredu'n ddiogel a chyfrifol yng nghefn gwlad gyda lansio pecyn adnoddau newydd.

Wedi'i gynllunio gan Gymdeithas Tir a Busnes Gwlad (CLA) a LEAF Education, mae'r deunyddiau addysgu wedi'u hanelu at athrawon ac arweinwyr grwpiau ieuenctid i gyfleu negeseuon hanfodol i ddisgyblion Cyfnod Allweddol 2 am y Cod Cefn Gwlad.

Amlygir negeseuon y cod o barchu pawb, diogelu'r amgylchedd a mwynhau'r awyr agored yn y pecynnau hyn drwy restr o weithgareddau llawn hwyl gan gynnwys ymarfer ymchwilydd pridd, gweithgaredd chwarae rôl llusernau awyr a gêm cof llwybr.

Y gobaith yw y bydd y pecynnau hyn yn helpu plant ac oedolion ifanc i ddeall bod ymddygiad diogel a chyfrifol yng nghefn gwlad yn hanfodol er mwyn ei fwynhau.

Dywedodd Victoria Vyvyan, Is-lywydd y CLA sy'n cynrychioli 28,000 o ffermwyr, rheolwyr tir a busnesau gwledig ledled Cymru a Lloegr:

“Mae cefn gwlad Prydain yn enwog dros y byd am ei harddwch. Nid yw'n rhyfedd bod miliynau o bobl bob blwyddyn yn ymweld â chymunedau gwledig ar gyfer gwyliau a theithiau dydd.

“Ond mae'r cefn gwlad yn amgylchedd gwaith, lle mae ffermwyr a rheolwyr tir yn gweithio'n ddiflino i gynhyrchu bwyd o'r radd flaenaf gyda safonau amgylcheddol a lles anifeiliaid uchel — ac mae'n bwysig bod pobl ifanc, yn arbennig, yn dysgu mwynhau eu hamser mewn ardaloedd gwledig yn ddiogel ac yn gyfrifol.

“Bydd y pecynnau adnoddau hyn yn galluogi athrawon ac arweinwyr grwpiau i roi cynlluniau gwersi hwyliog a deniadol at ei gilydd ar y Cod Cefn Gwlad er mwyn i blant allu rhoi'r hyn maen nhw'n ei ddysgu ar waith.”

Dywedodd Carl Edwards, Cyfarwyddwr Addysg Leaf:

“Mae LEAF Education yn falch iawn o fod wedi gallu gweithio gyda'r CLA ar gynhyrchu'r adnoddau hyn. Gyda'n gilydd credwn ei bod yn hynod bwysig bod pobl ifanc yn dysgu o oedran cynnar am y negeseuon pwysig yn y Cod Cefn Gwlad. Po gynharaf y mae pobl ifanc yn profi llawenydd cefn gwlad, y mwyaf yw eu siawns o ddatblygu mwynhad gydol oes a pharch o'r amgylchedd o'u cwmpas.

“Bydd cefnogi athrawon drwy'r adnoddau hyn sy'n gysylltiedig â'r cwricwlwm nid yn unig yn eu helpu i ddarparu dealltwriaeth o sut mae'r cefn gwlad yn gweithio, ond hefyd yn helpu eu disgyblion i gyfieithu pwysigrwydd sut i barchu, amddiffyn a mwynhau yn gyntaf eu hamgylchedd lleol ac yna'r cefn gwlad ehangach.”

Hanes y Cod

Cafodd y cod, a gyflwynwyd gyntaf ym 1951, ei adnewyddu yn ddiweddar yn dilyn cynnydd yn nifer yr ymwelwyr â chefn gwlad yn ystod y pandemig.

Mae'r CLA yn parhau i lobio'r Ysgrifennydd Addysg Gavin Williamson i gynnwys y cod fel rhan o gwricwlwm yr ysgol.

Mae'r pecyn yn rhad ac am ddim i'w lawrlwytho o wefan y CLA ac mae hefyd ar gael ar yr Ystafell Ddosbarth Cefn Gwlad - gwefan a ddefnyddir yn rheolaidd gan athrawon sy'n chwilio am ddeunyddiau sy'n gysylltiedig â materion gwledig.